أنقذوا المخزون الوطني من اللبلابي

من مظاهر الفشل السياسي لتيّار سياسي و إيديولجي معيّن هو تبرير فشلهم و فراغ مشروعهم بمنح شرعيّة معيّنة لأنفسهم عبر مؤامرات صايرة ضدّهم تحت الطاولة و وراء السّور: الخوانجي يواجه في أشباح الماسونيّة الفرنكوفونيّة الغربيّة العالميّة و الشيوعي في الغرب الإمبريالي و الليبرالي في الوهّابيّة الخليجيّة و خاصّةً الزوز الفئات لخّرانين أقلّ عباد قاعدين يخدمو في العمل القاعدي السياسي و إلاّ ينجحو مش يخلّطو رسالتهم و مشروعهم موازاةً مع هلوستهم على الأقلّ، و زيد التونسي إلّي ما عندوش وعي و عمرو لا جات فرصة مش يبني لروحو وعي سياسي مش يختار بالطبيعة الحلّ الأكثر سهولة لكلّ هذه الجوجمة، قلّو قال الله قال الرّسول يتبّعك تقول عليه منوّم مغناطسيًّا من غير ما يفهم النصّ و مغزاه...على خاطرنا ببساطة نحبّو عباد تخاف ربّي و ما يهمناش في الباقي ، (تقول عليه واخد كما صخر الماطري كان يصلّي كلّ صلاة في وقتها كي يولّي عندو الحكم في يديه مازال مش يتفكّر ربّي).
نادرا الأحزاب الّي جبدت روحها من النزّاعات الإيديولجيّة و الشعاراتيّة التافهة (التجارة بالهواء) و فهمت إلّي الضامن الوحيد الآن مش يتحقّق الإصلاح في البلاد هو إعادة بناء مؤسّسات الدولة (منظومة الرشوي في الوزارات ، وزارة الداخليّة، العدل)و تحييد الإدارة و بناء مجتمع مدني يُرسّخ قيم المواطنة يعمل على تنمية البلاد في بقعة المنظومة القديمة إلّي كانت مبنيّة على الإحتجاج أو المناشدة للسلطة و بالتالي نضمن أن يستمّر كيان الدولة-الوطن يوم تفشل تجربة تطبيق الهراء الإيديولوجي بتاعكم نهار إلّي مش ياخذو فيه الحكم.
نادرًا ما سمعنا خطاب عملي يقلّك صراحةً راهي منظومة الفساد مترسّخة و إلّي الإصلاح مش ياخذ عوام و عوام مش يعطي عشاه.
كلّ واحد يقدّملك التمشي بتاعو الإيديولوجي إسلاميًّا كان أم شيوعيا أم إشتراكيًّا أم ليبرالي كحلّ و طبخة
جاهزة (clé minute)
لكلّ المشاكل التي تعرفها البلاد في حين أنّه إصلاح الهيئة العليا للقضاء و تحقيق إستقلاليّة مش ياخذ سنين الله و بما أنّكم شعبويين يمكن مش تزيدو ترسّخو تبعيّتو لسطلتكم أكثر (شوفو مثال الهيئة إلّي إسمها كبير ممثّلي جمعيّات قاعدين يحكيو بإسم الأحزاب مثال: سمير ديلو).
و بالطبع مش يكونو زادة ،و ربّي يسترها البلاد، ستارًا للممانعة و المقاومة على الطريقة السوريّة ضدّ عصابة الأعداء اللّي ذكرتهم أوّل المقال لحماية الوطن و الدّين و الهويّة و روسات اللّبلابي السريّة و مخزونها الإستراتيجي تلك الأكلة الوطنيّة الأصيلة إلّي هل الشواطن الأجنبيين يحبّو يسرقوها منّا نظرًا لمخزونها الإستراتيجي الوافر القادر على تغيير معادلات القوّة العالميّة إلّي تحبّ شركاتهم تسيطر عليه.

هذا الكلّ يأكدّلي على حاجة معيّنة غاية أغلب الأحزاب هو أخذ الحكم مطلقًا (مع فُنتاسم التصرّف في البلاد و الهيمنة عليها ذلك اليوم كالتجمّع) و الإنصراف عن تحقيق بناء تنموي حقيقي للبلاد مفكّرين في أبنائنا و أبناء أبنائنا.
كفاكم هلوسة يهديكم ربّي و إخدمو لبلاد أو على الأقلّ قدّمو أنفسكم على أنّكم ترغبون بخدمة البلاد لا معارك حبوب الهلوسة و التشحين الشعبي.

المرأة في ما نقله البخاري عن الرّسول صلّى الله عليه و سلّم

أطالع في هذه الأيّام كتابا لمفكّر قرآني فيه نقد يقول عنه أنّه عقلاني لما نقله البخاري عن الرسول صلّى عليه و سلّم كأحاديث و أردت أن أشترك معكم جزءًا من هذا الإكتشاف الغريب.
ولد بخاري عام 194 هجري هذا الكتاب إسمه "جناية البخاري" للعالم القرآني زكريا أوزن و إذا أردتم قراءة الكتاب فهاهو الرابط لنسخة إلكترونيّة. هنا نبذة عن ماهو موجود في الكتاب
-----------------------------------------------------------------------------------------------
من يبحث في الأحاديث المتعلّقة بالمرأة في صحيح البخاري و غيره بعمق و حياد يجد أنّ المرأة لا تتساوى مع الرّجل، و أنّها في النسق الثاني دومًا و لا يمكنها أن تكون صنوه، و ذلك بالرغم من كلّ أساليب التلميع و التخريجات و التبريرات التي يتبنّها السادة العلماء الأفاضل.
و الحقيقة التي يتوجّب ذكرها بكلّ جرأة هنا أنّ دعاة المسلمين على إختلاف مستوياتهم قد نجحوا بزرع عقدة النقص و الدّونيّة في المرأة المسلمة
لدرجة أنّها أصبحت تدخّل في بنيتها الجينيّة، و أقنعوها بأنّ تلك العقدة المرضيّة هي ميزة تتمتّع بها الأنثى المسلمة دون غيرها من نساء الأرض. و جعلوا المرأة المسلمة منظِّرة في الإحتقار الذّاتي و الدّونيّة بملئ إرادتها و كامل وعيها و تصميمها حتّى أنّك تجد المعلّمة و المهندسة و الطبيبة و عالمة الذّرة تقرّ بأنّ الرجل أفضل منها و أنّ له القوّامة عليها وإن كان يفتقر إلى الحدّ الأدنى من العلم و الثقّافة.
و سترى الأخت المسلمة من خلال ما سيتمّ إستعراضه من أحاديث و هي غيض من فيض أنّها مسلوبة الحقوق و مهمّشة و مستبعدة في معظم الأحيان عن القضايا الأساسيّة و الأمور الهامّة، علمًا أنّ الله- عزّ و جلّ-قدّ كرّمها كثيرًا في كتابه العزيز و هو ما سأحاول بحثه في نهاية هذا الفصل.
كلمة أخيرة قبل أن أبدأ سرد الأحاديث أقولها للمرأة التي أحبّها من كلّ قلبي ، أحبّها لأنّها أمّي و أختي و زوجتي و صديقتي و حبيبتي و زميلتي و دنيتي كلّها : عليك أن تطالبي بحقّك الذي وهبك الله -عزّ و جلّ- إيّاه و أغتصبه منك أصحاب التفكير الذّكوري الممثّل برجال الدّين و أتباعهم الكثر. عليك أن تعملي و تتعبي و تجهدي للحصول على ذلك، و إعلمي أن صاحب الحقّ هو الأولى بتحصيل حقّه و تذكّري قول الشاعر:
و ما نيل المطالب بالتمنّي

ولكن تأخذنا الدنيا غلابا

و تذكّري أنّ الأمّ التي تعشق رضيعها و تدفع حياتها للحفاظ عليه قد تسهو عنه و تنساه إذا لم يشعره بحاجته للعناية به و إرضاعه عبر بكائه وصراخه.

الفصل السادس
البخاري و المرأة
صفحة 113-114

أهواك أيّها العلم المفدّى...

اليوم 25 جويلية. اليوم عيد الجمهوريّة.

عيد الجمهوريّة أوّل مرّة ياخذ معناه حتّى ولو جزئيّا بما أنّو رئيس الجمهوريّة غير شرعي في إنتظار الإنتخابات... مبروك لكم يا توانسة إفتخرو برواحكم و بوطنكم أما لازمكم تخدموها و ما تاقفوش في إحساس الفخر... لازمنا بعد الثورة، نرسّخو قيم المواطنة و نبنيو جمهوريّة حقيقيّة لأبنائنا و أبناء أبنائنا ... الطريق مازال طويلاً

أهواك أيّها العلم المفدّى...

ماهو جمع قنطروف ؟؟؟

بعدما شفت الفيديو بتاع المسيرة هاذي التي أظهرت وصول التوانسة إلا قمّة الوعي بأسباب التفوّق الحضاري و العلمي و الثقافي إلخ إلخ

ذكّروني بحوار عملو مرّة سيدّ قمني مع الإسلامي الراديكالي هاني السباعي و جعلني أسئل نفسي ماهو جمع قنطروف ؟؟؟؟ (شاهدو آخر الفيديو) أنا كليبرالي مع حريّة إرتدائهم إلّي يحبّو لكن خوفي فقط أن تصبح مشاغلهم السطحيّة هي الشاغل الرئيسي للرأي العام...

خايف على تونس،على خاطر في المستقبل القريب بالريتم هذا، لا ثقّافة لا علم لا تقدّم لا والو مش ترسّيلنا نعملو ليهم إحصائيّات ودراسات معمّقة و إستراتيجيّة إلخ إلخ ونحاولو نعملو لغير المحجّبات وغير المنقبات وغيرالملتحين المقمصين نمّوذج و برنامج وطني يحيث نستطيع دمجهم في المجتمع. بإنجاز عمّك المنصف بن سالم بالطبع بعد ما يفسّخ كلّ ما أٌخذ من كتابات الدوعاجي في البرنامج الدراسي
:/

ندائي للصفحات الفايسبوكيّة الكبرى: أنشرها من فضلك

يجب إكمال الثورة و الإنتصار لعائلات الشهداء أما تعرفو وعلاه مش تصعاب عليكم يا أيتها الصفحات الثوريّة التونسيّة، على خاطركم خلافا للصفحات المصريّة ذات التحاليل الرصينة و الحكيمة مستواكم واطي و هابط ياسر، كلّ يوم تخرّجو إشاعة و كلّ يوم فمّا شخص أو مجموعة أشخاص معينين يتسبّو فيهم عندكم بتشجعيكم و بأسلوب قمّة في الرّذالة و الدناءة...
ما فمّا حتّى تحليل نستحظرو قريتو في صفحاتكم نحسّو فيه عمل تحليلي عقلاني معيّن و بارز.
كلّكم تنشرو في أنصاف الفيديوات (عمركم لا تنشرو رأي مثلاً و من ردّ عليه) فيديوات في الأغلب لها أهدف بروباغنديّة إشهاريّة لفائدة طرف سياسي معيّن لا غير.
عمري لا ريتكم تحاولو تنشرو فيديوات تنمّي الوعي السياسي في بلاد عمرها ما صار فيها ممارسة سياسيّة و لازم بالتالي تكوين للتوانسة من الأساس.
مازالتو تحكييو في السياسة بلغة أسود -أشرار/أبيض-أخيار في حين أنّو السياسة هي أكثر حاجة نسبيّة في العالم و ما فيهاش لا خير لا شرّ فمّا مصالح فقط، على هذاكا تلقى شيوعيين متحالفين مع إسلاميين مثلاً.
و ما ننساوش عادة إقصائكم لمن ينتقدكم في صفحاتكم، تكريسا منكم لفكركم الثوري الأوحد صاحب الحقيقة العليا.
عادي ياسر أنّو الرداءة تولّد الرداءة و الفشل هو من الرداءة.